USA NGAM AH PEAM TUH

UNHCR te thuthiamna taw tulaitak Malaysia ngam om Pa Vankim S/o Sing Ngo (Dolluang) te innkuan 3 se, USA ngam (?? khua) ah, Jan 10 ciang pai tuh aa, Khampu (YSBC) zongh tua ni ma in pai tuh ci thu ki zaa hi.

ttt

TOPA TAW MAANGKHAWM

Tulaitak Tahan khua teang Pi Ciin Hum 80 (Limkhai) in khangham natna taw Jan 1, 2012 ni sun nai 2: 27 in hong nusia hi.

Tahan Sizaang pawlpi TSBC in Jan 3, 2012 ciang huina nei tuh hi.

Ama se, Australia ngam om Pa Kam Za Pau le Maj Hang Khaw Khai te ii nu ci hi.

thutatuam

SRBA Branch Office II

TSBC te ii SRBA a piak leitangh tungah ah a kisa tu SRBA Branch Office II sia tu in Foundation kiman zo a, a tungsia zop to tu September tha sungin kipan thei kik
zo hi. Tu kum sung manthiang dong sep tu kingeal hi.

source: khuavak,
Photo: samualtun tahan (1jan,2012)

MSCCF KUMTHAK MUANA

Malaysia Sizaang pawlttpi MSCCF in zongh kumbo ni zaan nusiat na leh, kumhthak ni zing muakna programme nei aa, mi 200 val bangh kihel thei hi.

Laithiang me sawkna, Lasakna, le ngualnopna tatuam zongh nei aa, Jan 1, 2011 nipi kikhop zongh munangh kheukho in, Kumthak kikhop le sun an te kisiim hi.

ttt

2012 new year - slideshow maker

YSBC CHURCH SCHOOL PICNIC PHOTOS

dOPUI TUNG AH LUNGDAM

YSBC CHURCH SCHOOL PICNIC - Slideshow

YSBC CHRISTMAS

TOPATAW MAANGKHAWM

Tulai tak Tahan khuateang Pu Hau Zam (83) (Limkhai) in Dec 30 sun nai 2:00 pawl in khangham natna taw hong nusia sia hi.

Anusiat a innkuan puite tung ah Topa in henepna hong piaksak ta hen.

Malaysia panh atapa Tualno te topuina se Dec 30 nitak ma in, MSCCF pawlpi lampuina taw neisawm hi.

ttt

DEC 29, YANGON AH SUAKKHIAL NA

APUAKTHAM KHAT HANG IN YANGON AH MI 17 THI 80 LIAM

Yangon , Mingalar Taungnyunt, Setsan veang ah, Dec 29, 2011 zing nai 2:00 pawl in apuaktham khat om (bomb ? bang? kihe ngawl) mi 17 thi in, 80 bangh liam ci'n AFP news sung ah kisua hi.

Amute ii sondan hi leh, mi 50 bangh ci aa, Palik te sang pan zing nai 6:00 in, 12 thi ci hi.

ttt

YANGON MEI METER MAN KHANG

Yangon khuapi sung electric mei meter manh Jan 1, 2012 ciang pakipan khang tuh ci'n Dec 28, 2011 kawl news sung kisua hi.
Nidang
Unit khat ciang 25 te 35
Unit khat 50 te 75
Unit khat USD 0.08 te 0. 12

SINGAPORE AH POLYTECH SAANGKAA

Lia Mang Lun Cing D/o Capt Khai Nang (Suangdaw) se, Singapore ah Poly Technic saangkaa thei tuh aa, Dec 27, 2011 in pai hi.

Amase 2008 in Tan 10 ong aa, Medical Saang kaa thei natu mat 4 sap taw kaa thei ngawl in, Ha Syavuan zongh uk ngawl aa, Poly saang ah entrance ahuan le ong ahi kom pai thei suak cithu kiza hi.

Topa in Thupha hong piaksak ta hen.

ttt

MSCCF PICNIC 2011 PAI

Malaysia Sizaang pawlpi MSCCF khangno te lampuina taw Dec 28, 2011 in KL, Rawang Waterfall ah Pawlpimi 180 bus 4 taw picnic pai hi.

Social Game kimaina, Ngupkhiatna ngaa mi 10 tuikiphumna , sun an neakkhop le, Tui-op na kinei aa, zing nai 10 pan nitak nai 4:30 se hun tawm no sung hong theng pai hi.

MSCCF PICINIC 2011 - slide show

MALAYSIA AH DONGTAWK MEETING

Zomi Social-welfare of Malaysia (ZSM) in kumcin kikhop le lampui thak kitealna Dec 26, 2011 in ZAM zumhpi ah vawt hi.

Lampuithak teng se
Lampui chairman: Kam Lian Mung
Secretary : Kap Lian
Treasurer : Zam Dal te kiteal ci hi.

Thukimna
ZSM Pawl tumna mikhat ciang 10 ci in, Biakinn, Khua kipawlna te in kumkhat atuh RM 200 pia tuh hi.

ZSM tumna anei ngawl mimal te in thina atawk tha leh, Ama ii kikhopna biakinn/ khua kipawlna te in RM 200 akhia le ama thi ciang RM 500 taw kihuu hi.

Koisung koisung ma tumna nei ngawl, ZSM ngangawn atum ngawlte thina a nei leh, Meisung hal natu kivai hawm pui sak tuh ci'n kithukim ci hi.

thutatuam

source from: luanngel momno

CHRISTMAS NI NIGERIA TAPIDAWTE BOMB TAWK

Christmas ni in, Nigeria ngam ah, Boko Haram akici muslim hiam toaite in, mun 3 ah Tapidawte suam aa, Tapidaw 40 thilaw ci'n AFP news sung kisua hi.

Abuja khuapi St. Theresa Catholic Church kikhop manzawk anasia mama bomb puak sak aa, biakinn khuvum kisia in, mawtaw tam tatak kisia in,

Saksang khuapi Damaturu ah suicide bomb taw security naseamte 3 thalup thuak aa, Amundang biakinn khat zongh ah bomb puak ci h.

Jos khua ah evangelical biakinn puasang pan biakinn nawngkai sak nuamte palikte in kaap vawk aa, khat se man hi.

Gadaka khua ah se, Christmas Eve ni biakinn naina ah, bomb puak hi ka leh, kuama thi ngawl hi.

(Boko Haram = Western education is sin)

thutatuam

SRBA Branch Office II

TSBC te ii SRBA a piak leitangh tungah ah a kisa tu SRBA Branch Office II sia tu in Foundation kiman zo a, a tungsia zop to tu September tha sungin kipan thei kik zo hi. Tu kum sung manthiang dong sep tu kingeal hi.

From : Khuavak

USA PEAM TUH

UNHCR te thuthiamna taw, suapui Nang Khan Kim s/o Nu Khai Khan Niang zong January 11, 2012 in, USA ngam ah peam thei tuh ci hi.

CHRISTMAS NI ZING UNAU 3 MEIKAH IN THI

Christms ni zing USA ngam Stamford Khua, Connecticus State ah, Christmas ni zing nai 5:00 in meikah huu in, Nu le pa suaktaa in, atano kum 10 , khat kum 7 apeang 2 thilaw ci'n AFP news sung kisua hi.

SINGAPORE TE CAROL MI 1000 VAL

DEC 24 zan Singapore (Marina Square) puasang ah, ngam tatuam panh thu umh mi pawlkhat, Singapore ngam pawlpi tatuam panh mi pawlkhat kingawm khawm in, Carol laa mi 1000 in sa aa, Poai en mi 7000 in zongh sak pui ngeei ngaai ci'n ST news sung ah kisua hi.

ttt

TO JESU SUAKNA MUN AH CHRISTMAS VAWT

Roman Catholic pawlpi (RC) te lampuina taw, Dec 24 zan in, To Jesu suakna (MUAN-MAWK) na ah, Christmas poai vawt aa, thu ummi tam tatak zongh kihel thei ci'n AFP news sung kisua hi.

USA NGAM AH PEAM TUH

UNHCR te thuthiamna taw, tulaitak Malaysia ngam om, SOM member Tg. Maa Mang (Bawlung Lam Za Cin tapa) le Suapuinu Htway Lay D/o Vaangpau (Theizaang) tanu te se, January 11, 2012 ciang USA ngam ah peam thei tuhhi.

ttt

SOM IN LEARNING CENTER ATHAK KHAT HONG

Malayia ngam Siyin Organization of Malaysia (SOM) in, KL, Cheras, Chrasria veang ah, laisin nuam patangte atuh, laisin saang thak khat, Dec 24, 2011 in honna nei hi.

Cherasria veang sung ah, Kawl, Zomi, Rakhaing kala etc.. patang 30 bangh pha in, Ahil tuh sya zong SOM Chairman Upa Thawng Khen Pau, Sm Thian Neam, Sm. Thianpui le Sm. Shing Nau (kachin+Sente) hi.

Tulaitak dinmun in, sponsor koi sung mama panh kinei ngawl lai hi.

thutatuam

CHERASRIA LEARNING CENTER - picture slideshow

AHAUNA TENG DONGHUUNA IN PIAKSAWM

Taiwan ngam sumhau minthang Samual Yin in anei le lamh Dollar billion 3 sung panh 95 % se, athi zawk ciang, donghuuna zak tuh in pia khol ci'n yahoo news sung kisua hi.

Ama se kum 60 pha in, a innkuan pui te zongh thukim ci hi.


thutatuam

MALAYMI 2090 CIANG 57 MILLION

Malaysia ngam ah, 2090 ciang mi 57 million phatu aa, 2024 ciang khanghaam atam bel pha tha tuh ci'n Putra Jaya zumhpi pan son hi.

Khangham mimal se kum 10 sung akiam suk zaw in kison aa, mi 100 sung pan 7 se, 65 tungsia pha ci hi.


THUTATUAM

NUPI-NU SHWE HMANN TAW KIMU

Daw Suh Kyi se, Naypyidaw ah, Dec 23, 2011 ni pai a, Turah Shwe Hmann taw kimu ci'n AFP news sung kisua hi.

SOUTH KOREATE NORTH LAMPUIPA HUINA AH PAI THEI

North Korea kumpi in, angam kumpipa Kim Jung Ii luanghawm phumna ah a-uap nuam South Korea pan ate zong pai thei hi ci'n amate ii website tung panh Dec 22, 2011 zaan hun in sua hi.

Khuangai pui na thu pholaak nuam South Korea pan mi tam tatak in, pai nuam tek in son aa, ngam ngii te zongh hon sawm hi.

Luanghawm huina se, Malaysia Sizaangte Picnic paini Dec 28 ciang vawtsawm lui lamh hi.

SAWDI ARABIA NGAM IN TAPIDAWTE ZAWNGSAK

Saudi Arabia ngam thuneite in, angam ah a theng Ethiopia ngam mi tapidaw 42 ii biakpiak kikhop laitak man ci'n worthy news sung kisua hi.

Matthuak 42 te in, athu ala he khol ngawl aa, kivel zazan phot in kison hi. Nidang in zongh tubangh aa, kiman ngei in kison hi.

Saudi Arabia ngam ah tapidawte se, ngamdangmi vo in kison a, suakta tatak in biakpiakna nei sak ngawl bek dom ngawl, kikhop na khawng ah zongh buluu thei lai ci hi. Laithiangtho le, tapidaw taw kisai, na tatuam te zongh Islam ngam sung ki awi ngawl ci'n kison ci hi.

thutatuam

LUTANG 2 NEI NAUSEN BRAZIL AH SUAK

Brazil ngam ah, nausen (pasal) khat lutang 2 nei aa, cidam in suak hi ci'n yahoo news sung ah Dec 22, 2011 nitak sang in kisua hi.

Lutang 2, lungtang khat, ahikom amin se, Emanoel le Jesus ci sawm hi.

Pong 9. 9 pha aa, anu ngilsung pan asuak ciang atosa in suak ahikom nai tam tatak hun laak kul ci hi.

Lutang 2 nei in thuak 2 nei ahikom, akoisia laakkeak sak zaw tu ziam ci'n doctor te in khensat thei ngawl aa, bang bangh hong khangto katawm ci'n et phot kul tudan in son hi.

2011 sung Brazil ngam ah, a 2vei na hi in, amasa asia asuak zawk ciang thi pai in kison hi.

Tuma kum 200 sung nausen hi bang (lutang 2 nei) in asuak se 14 pha zo in kison hi.

thutatuam

TOPA TAW MAANG-KHAWM

Tahan khua teng Khuasak (Pa Mang Cin Dal @ Dalpu)tapa Cin Za Lian @ Lianpi @ Arkar (Computer Technician) in, Dec 20 , 2011 zingsang in, alupna panh tho kik nawn ngawl aa, hong nusia suak ci'n kizaa hi.

Ama se Minuamsa Video pan editing seam khat hi in, Hi Thutatuam Multiply blog page zongh ama ii hong vawt pui hi. Topa pok biakna Laasak talent nei khat zongh hi .

thutatuam

DAW SUH LE THAI LAMPUI NU YINGLUCK KIMU

Tulaitak Thai ngam lampui Prime Yingluck se, Meekhong nguun(Shanngam nisuana sang) dung ngam teng meeting kaa kawm apai na panh, Yangon tuak suk aa, Dec 20, 2011 nitak nai 5:30 pawl in, Daw Aung San Suh Kyi taw kimu ci'n VOA news sung kisua hi.

1988 zawk ciang, amasaphit kimu khopna hi in, ngam buai 1988 zawk Thai ngam lampui alian bel khat le Daw Suh kimu phitna ci hi.

thutatuam

GLOBAL ZOMI ALLIANCE KAWLPI AH

Global Zomi Alliance (GZA) ci-in, leitung bup Zomi theampo kipawlna sia 2010 November tha in kiphuan a, akhat veina mipi kikhop, thusinna sia Agape (AG) Kalaymyo ah, 13-18 Dec. 2011 hunsung kikhawm tua thei uh hi. Nitak sim in ZBCM huang sungah Pathian thungai khopna nei thu uh hi. Tua sungah SRBA pan mi(10) kihel thei a, avekpi mi (300) val cithu kiza hi.

Sya Nangkhai

PRAYER MOUNTAIN LEITANGH KHAU KIKAI

12 Dec. 2011 (Monday) ni SRBA-OB te lampui inTaingen Thungetna Mual ah vaipuak nei, Pa Zam KhanCin (Thuklai) taw Government Grant Land vawttu inAcre (8.50) Pikhau kai in thungetna taw apna neitheiuh cithu kiza a, maisang maban theampo Topa ih mahong panpui natu thungetna taw mapang khawmtektawng.

Pa Ngin Nang te innkuan in zing-an Sialsa meekhamteak taw an vaak ci thu kiza hi.

From: Sya Nang Khai

SRBA PASTOR TENG EXCUSSION PAITHEI TEK

12-13 Dec. 2011 ni Hiangziing Pastor teng Falam dong ah Video kizai ahizong, thu tuatuam kikum kawmtu ahizong Excussion pai uh a, Pawlpi sungah naseamteng hibang in Pathianthu, Leitungthu ah thu kisi vadiam cisia thuzawk huai mama, ettee huai mama citek uh hi.

from Sya Nangkhai

THUKLAI LE PUMVA KINUAK (Cimh Phawng)

Tulaitak se Pumva suapuite le Thuklai suapuite akinuak laitak ci'n Pumva pan suapuite khat in thutatuam ah hong zasak hi.

Akinuakna ahang sia. 2011 Siyin Cup bawlung kidem lai in, Pumva te zintun na Inn sia Thuklai pan suapui te na (Ahang ???) mei pia ngawl ci hi.

Tutuung Thuklai mei vai taw kisai in, Pumva pan suapui te in, ko taw kisai ngawl ci'n zaak sakna hong nei tan ci'n hong kun ahi man Thucing ahe nuam te in, hong kan ta vun hong ci sak hi.

S.T. Pau
(Malaysia)

MIHARJA CONDO ADVANCE CHRISTMAS

MALAYSIA , KL, CHERAS, Miharja Condo cellgroup te in Advance Christmas Dec 17, 2011 in vawt aa, mi 50 kihel thei hi.

Innkuan 9 in, Mee namkhat tek sii in mee kikum tek aa, Lucky draw vawt vawt na tuh Newlife restoration panh Pastor Lily chin in, RM 100 hong pia aa, tusia taw lucky draw kivawt hi.

AWM KIZOMH NAUPEANG KHAT THI

Chili ngam Santiago, zato ah Dec 14 , 2011 in asuak naupeang numeino awm kipee te 2 sung panh khat ii nuntak na sia doctor te in hunh zo ngawl aa, thisua hi.

TOPA TAW MAANGKHAWM

Tulaitak Tahan khua teang, Nu Ciang Za Dim@ Nu Dim 73 (Lophei) w/o Pa Lam Nang in taai cancer natna taw Dec 19, 2011 nitak nai 6:00 pawl in hong nusia hi.

Amase anat zawk ngei zo in kison hi. Topa in anusiat a innkuanpui te tung ah henepna hong piaksak ta hen.

ttt

JOY TO THE WORLD CRUSADE

Malaysia Sizaang biakinn MSCCF in, "Joy To The World" Mini Crusade khat December 18, 2011 in abiakinn MSCCF pawlpi ah nitak nai 8:00-10:30 vawt aa, mi 200 val kihel thei hi.

Kawlmi (Budism)te atuh ngiimna hi ka leh, Kawlmi tatak mi 10 val tukhawng bek kimu aa, Ngupkhiatna thu Rev Hlasai thuhilna zongh thangaa huai peuma hi.

Hun kipat lian in, Drummer for Christ (DFC) pan Mr, Vince le Simon in drum nguak tumna hong nei masa in, Praise and worship zongh anop citatak in, Sya Henkhup le alawmte hong lampui zawk cian ZOMUS ( Zomi Music Uplift Soceity) panh Biaktung, Suihlun, Sianhoih, Deihmang, Cingpi, Nuamboih, Lianpi, le Thangbawi te hong kihel thei hi.

Sm Suancing le team te in, Dance performence hong nei in, Rev Hlasai lampuina taw Kuala Lumpur Baptist Church panh Drama hong nei zawk ciang, Rev Hlasai in thuhilna nei hi.

Thutatuam

JOY TO THE WORLD - slideshow maker with music

TOPA TAW MAANGKHAWM

Tulaitak USA ngam teang Pu Vum Khua Tual 78 (Limkhai Bungh) in December 18 ni in hong nusia hi.

Amase Limkhai khua (Pu Lam Zam & Pi Niang Khua Hung) te ii tapa hi in, Khalhkha khua Information Dept ah kumpi naseam in seam ngei aa, hi.

USA Maangkaang pawlpi khat ah, Pathian nasep na in, biakinn cing seam ci hi.

........................................................................................................

Daw Cingh Khan Huai(Cingh Pawt)Kum( 51) zongh cancer nat na taw Dec 15,2011(Thurs Day) am 4:00 (kawlngam)hun in a ten na (siyin ,thingunau)khua pan hong nu sia hi. Dec 17,2011 (sun day)pm 2:00 hun in Siyin (thingunau)than ah ki phum zo hi. (from: zamnokt's sizangnet report)

ttt

REFUGEES NGUNKUANG KHAT TUISUNG TUM MI 200 BO

Indonesia ngam pan Australia ngam ah apai ngunkuang khat hui-ham tawk in, tuisung tum aa, mi 200 val ci in. Australia ngam thunei te in, Dec 19 in son hi.

Nung nino ni in, Indonesia ngam Java tuikulh pan tai 55 kikuala na panh hi aa, asua taa mi 6 tukhawng bekma om tuak hi.

Iraq, Iran le Afghanistan pan hi aa, Australia ngam ah ngambeal seau sawm dan hi.

ref: reuters

KOREA LAMPUIPA KIM JUNG II THI

North Korea ngam ii nuclear nei natu avaihawm pipa/ ngam ii thunei pipa Kim Jong Ii 69 se lungnatna hang in thi ci'n angam ii TV news sung Dec 19 ni in kison hi.

Kum 17 sung ngam ukna zaa apa kung pan ngaa aa, athi zawk ciang atapa 3na pa in apa zaa laih tuh hi.

Kim Jung Ii se apa Kim Jung Sung (1994 thi) in kum 20 sung comunist sung ngam uk aa, tua zawk ciang atapa Kim Jung Ii tung ah thuneina aap hi. Tu Kim Jung Ii thi zawk ciang atapa 3na Kim Jung Un in kumpi zaa ngaa tuh hi.

South Korea ngam in, Kim athi zawk ciang bang thukhat po apiang tha leh ci'n nasia tak kikum na nei ci in, AP news in son hi.

thutatuam

PHILIPPINE AH HUI SUANG VAAL HANG 600 THI

Philippine ngam thang sang Mindanao island mountainous region ah hui suangval Washi hang in, nipini , mi 652 thi ci'n AP news sung ah kisua hi.

Athi tuza ahi hang 900 val se omna kihe ngawl lai aa, atamzaw thi tuh in ki-muang maw hi.

Mi 45,000 tukhawng ngimh ngaa aa, mi 500,000 in, tui hamsat law ci hi.

thutatuam

CIMH PHAWNG

LAI NEI ZAWK KUM 120 CIN KHANSUANG PHUNA AH SAPNA

Atung athu taw kizui in Siyin Christian Community (SCC) min taw Sizang Lai ih nei zawk kum (120) cin lungdam kona, A (4) veina Lai kikupna & A (3) veina Concert 16-20 November 2011 hun sung Siyin Baptist Church, Siyin Ywa ah SCC min taw kivawt hi. 20 November 2011 ni Siyin Baptist Church, Siyin Ywa ah zingsang nai 10 hun in Khansuang khat thanop huai tatak in kiphut theizo hi.

Lampuite ngealna sa om bangin a mun niina, Khamtung Zongam Township (5) ih lamka bom Taingen ah LAI ih neizawk kum (120) cinna KHANSUANG kiphut kiktu ahikom, Pawlpi mi theampo nong pai hamtang natu in hi lai taw kongsam uh hi.
A thu le la sia ihheak teksa ahikom lampuite in MUAN LE SUAN le MAINAP zawhiat teng hi bangin MAIZUM ngawltakin MINAM atu nasepna ah nong hanciam hamtang natu in hi lai taw hesuak zong hong ngen nuam lai khu hi.

Ani 30 December 2011
Ahun 10:00 AM
Amun Taingen

INDONESIA NGAM AH PUNK ROCKTE MAITAT THEI NGAWL

Indonesia ngam Aceh ah nung nino ni in, Punk Rock music a uk khangno 64 se aluu meettol sak ci hi.

Pasal 59, numei 5 kihel in, Indonesia ngam ii ngeina sia susia ci ahi kom, a stage show vawt na pan matthuak aa, asam ameet sak zawk ciang, Tuicing na khat ah kibual sak aa, tua zawk ciang apathian biakpiakna neisak ci hi.

Source: Thenation, AFP

MSCCF JOY TO THE WORLD CRUSADE

Kawlkam pau Kawlngam pan mite atuh ngealna in, Joy To The World mini crusade khat Malaysia Sizaang pawlpi MSCCF in vawtsawm hi.

Pawlpi lampuina taw, ZOMUS pan lasa thiamte, Malaysia ngam drum tumthiam in minthang "Drummer For Christ" pan lampuipipa Vince le alawmte le Dancer pawlte zongh kisam hi.

Kawlngammi te atuh ngealna hi aa, Kawlkam taw Rev Hlasai main speaker tuh in kisam hi.

thutatuam

MALAYSIA AH SIZAANG SAANG-INN THAK

Malaysia ngam Kuala Lumpur, Cheras, Cherasria mun ah, patang te atuh laisin saang khat Sizaang pawlpi MSCCF in vaihawm hi.

Hi Cherasria sung ah ngamdang mi patang 50 tukhawng om aa, refugee te atuh saang khat zongh om ngawl lai in, patang saang akaa nuamte in, minit 20 lampai akul na Ulek sang ah apai vo kul hi.

MSCCF ii mission saanginn khat in thukimna kinei aa, Hi mun ah akaa nuam akua mapo atuh minam doidan na om ngawl in, kaa sak thei tuh aa, Saang taw kisai seam tuh in, Upa Thawng Khen Pau, Sm. Thian Neam, Sm, Thian Pui le, Sm. Shin Naungte tavuan kipia hi. Sya thasum/ noptuam zongh sonna kinei ngawl ahikom akua mapo in hanciam pui tek tawng.

Sizaang Saanginn Thak - slide show

KAWL KUMPI IN NLD PARTY PERMIT PIA

December 13, 2011 Kawl news (Kyaymong) sung ah Daw Aung San Suh Kyi le aparty te legalized sak kik zo ci'n kisua hi.

December 12 in, NLD party in, logo thak zongh vawt kik zo aa, nidang in azak Kawl Kha Mauk sia hi nawn ngawl in, Aksi le Utong lim ci kik hi.

thutatuam

MALAYSIA AH KAWLTE VAWTTAWM VANTAW KIMAN

Malaysia ngam ah Kawlngam mi 3 se, vawttawm van te hang Malaysia palik te in nipi khuavak ni in, man hi ka leh, 1 se suata kik ci'n "NST" news sung ah kisua hi.

Amate kung pan Malaysia passport 10, Kawlngam 57, Bangaladeshi 21, Indonesia 6, Thai 2 le India 1 matsak hi. Lai tatuam/ passport/ seal/ UNHCR card vawttawm/ sticker/ rubber stamps/ le Malaysia officer te ii sign thoe sa lai tatuam (vawttawm) te matsak hi.

Hi vawttawm te hang in thakhat RM 30,000/- bangh ngaa tawn tung in kison in, tusia bek dom ngawl in, Kawlngam pan hong tum kuu nuamte atu zongh naseam te ci'n Malaysia thunei te in ngaw hi.

thutatuam

INDIA TE ROBOT NGALKAP VAWTSAWM

India scientist te in, ngal sung zak tuh Set-yoke (Robot) vawtsawm ci'n India' Defence research and develogpemnt Organization (DRDO) in nipi khuavak ni son hi.

Mihing bangh in vawtsawm in, Mualkawm luam kawm ah ngal van tatuam te apua le apai pui te hi sak tuh ci hi.

USA PEAM TUH

UNHCR te thuthiam na tawh, Malaysia ngam om pa Lian (Limkhai) azi nu Seap le atanu Uang Uang te innkuan 3 se, December 12, 2011 ciang USA ngam ah peam thei tuh ci hi.

THUTATUAM

KEPLER 22B AH AKUA ZONGH THENG ZO THONG TUH ZIAM

USA ngam scientist NASA pan ate in, December 6, 2011 in, Leitung taw akingui aw ngawl van zawl dang khat ah, Leitung sang in azaa 2 val bangh alian zaw tuh Kepler 22b akici leitung dang khat mu nathu maan hi ci'n khensat na pia hi.

Hi Kepler 22b sia se 2009 kum Pyintit ngam mipilte ii mukhiat hi aa, Mihingte tenna leitung pan 600 light year kikhuala ci hi. (1 light year=5.9 trillion miles) khuahun asatna 22C' hi in, super market sung aircon ii votna taw kikim tuh muang maw hi. Ahi zong suang ziam leitangh tatak ziam kician ngawl lai in son hi.

Source: CBS, AP, New Straitstimes