Wednesday, November 30, 2011

UNAU PASAL 3 LUNGNAT TAWH-LO IN 2 THI

Italy ngam Sicilia tuikulh ah teang unau 3 se hunkhat sung lungnat ngaa khawm in, 2 se thipaih aa, khat se nungta man ci'n AFP news sung kisua hi.

Nung nipini hi in, Guido le Alberto Garofalo akici te 2 se picnic pai aa, apaina Etna Meimual ah, Giodo 45 se lungnat hang in, thi ahikom, ama taw a omkhawm a upa Alberto, 54, zongh anau hang in thipai ci hi.

Anungta asuapuipa Salvatore se, anu zato lumh sia vil in apai laitak ahi kom, tua thu azaak ciang alungnat hang thi dadek ahi zong, Zato ate in alungnat thaina zatang pia man in suakta man ci hi.

Thutatuam

Tuesday, November 29, 2011

INDIA SANG NGAMNGII NGAM-KHING ZO NGAWL

Kawlngam le India ngam ngii Khuapilian khat ahi Imphal ah, November 29, 2011 in, nam tatuam hiam toai te man nuam ahikom, bus tai theampo tawl nga sak aa, pasal akici theampo thudokna neisiat ci thu, ifp news sung ah kisua hi.

November tha sung Meitei te 98 man in, kison aa, 10 tukhawng that in, India te sang panh 7 khawng thilaw ci hi, Kawlngam ngii sung Cikha khawk naina teng ah, zongh Meitei te pawlkhat Kawl thuneite ii, vaihawm sakna taw om ci'n tu nung nipi zonet sung ah kisua hi.

thutatuam

TOPA TAW MAANGKHAWM

Tulaitak Limkhai Bungh teang Pi Neam Khua Hung 83 (D/o On Khawi) in, Khanghaam natna taw Limkhai Bungh pan November 30 ni zing hun in hong nusia hi.

Ama se tuni ciang dong innkuan pui nei ngawl hi. Anusiat amealheak ulenau te tung ah Topa in hong heneam ta hen.

thutatuam

LIAMKHAI BUNGH AH ZBCM TE MISSION PAI

ZBCM (Zomi Baptist Convention of Myanmar) Pan Rev Pau Khan Khai lampuina tawh Limkhai Bungh ah Pathian-thu taangko kawm dam ngawlte ouna nei sawm in November 30,2011 in doctor te pawlkhat taw pai ci thu ki zaa hi.

Thutatuam

Monday, November 28, 2011

MALAYSIA UNHCR ZUMH AH KIDOP HUAI

Zomi Tedim kampau numei khat se IOM ah thisit (Medical Check up) tua, apai hinapi in, Tuibuk muan ahi kom, IOM naseam khat ahi, Mr. Peter (Khalkha) tuibuk kuana nei ziam? kei zong muan nuam ingh ci aa, kipia ngawl buang hi.

Zatawp leh muan nangawn amun leh ahun teal thiam ngawl lianga, Tedim kampau numei khatin, hong ngamtat ciang, Zomi buppi atu minsiat/mindaina nasiatak kingaa suak hi.

Kuama hongzuak hingawl-a, ei leh ei kizuak tatak ih hi na phawk tek leng uk huai hi. Mailamasang IOM leh UN tawh kisai zum khat pawpoh ihpai ciang, thiangtho tak leh kilawmtaka, ipaitek tu zong deihsakna hong zasak ung ci'n
Nov. 25, 2011 Friday ni-in, IOM ah ICMC min tawh apai suapui numei khat tung pan thu kingaa hi.

Ref: lungel-momno

PAKISTAN NGALKAP 24 NATOTE IN THAT

NATO Ngalkap te in, Afaghanistan le Pakistan ngamngii ah, November 27, 2011 in Ngii cing, Pakistan ngiaphual munh 2, Kaap khial in, Pakistan ngalkap 24 thilaw in, 13 liamlaw thong hial ci hi.

NATO te sang pan Akakhial theina se Pakistan te sang pan kaap masa ahikom NATO te in, Ngalvanleang le Helicopter te zangh aa, akaap le 24 thilaw suak ci hi. Pakistan ngalkap uliante in, tua thu pom thei ngawl aa, NATO te in, kaap masa ci aa, NATO te ii tatkhial na se hi bang in kimai sak vazeang ngawl tuh aa, kilemna sia sak lel tak ci'n Pakistante ngalkap maangpa inson hi.

Source :Reuters, AP

AUSTRALIA NGAM PEAM TUH

UNHCR te thuthiamna tawh Malaysia ngam pan Pa Mun Pau (Pumva) te nupa le anu se November 30, 2011 ciang Australia ngam ah peam thei tuh aa,

Pa Cin Khat Khai te nupa zongh December 15 ni ma Australia ngam ah peam thei tuh hi.

Sunday, November 27, 2011

SOUTH KOREA IN, THONGINN CING TUH SETYUK ZAKSAWM

South Korea ngam in mailamsang thonginn cing tuh in Setyuk(Robot) te zaksawm ci'n newsfeed news sung ah kisua hi.

Hi Robot te se camera kithua in, thong inn pa ataikuu nuamte, amate le amate thongsung ah akithatlum te khaam zo tuam tu in lam hi. Pi 5 dektak tukhawng sang in, Mui 4 kithua in, thongtaak te tatzia se encik tuh hi.

Hi Robot khat ciang US dollar 863,000 manh ci aa, 2012 march tha ciang kipan Pohang akicina thong ah zak kipan tuh hi.

thutatuam

TOPA TAW MANGKHAWM

Tulaitak Malaysia ngam om Esther Parte << Voklak khua Nu Sui Neam Cing ii tanu ) le Pa David Thang (Kawlte) te ii tanu Cing Khan Uap piakzawk that khat se dam ngawl pianpui pumpi zawngkhal aa, operation vawt tuh hi ka leh, dam zo ngawl in, Nov 27, 2011 zing nai 2:00 pawl in hong nusia hi.

Ama se operation vawt natu se, RM 15,000 kisamh kawm panh UNHCR te ii huna tuh anga ngak hi aa, asum tuh acin ma hi bangh in hong nusia ahi kom, kikhua ngai mama hi.

thutatuam

Thursday, November 24, 2011

ATOPA ATHI ZONG ANUSIA NUAM NGAWL UI

Sengam Shandong province, Qingdao khuapi naina Panjiatun khuano khat aa, ui khat se atopa athi zawk ciang bo vingveng hi ke leh akhuapuite in, atopa ii thina thaan hui ah a omtop hun lam se he kik ci hi.

Atopa thina thaan hui ah bek om nuam aa, amun dang pai nuam ngawl in an zongh ne ngawl ahikom, akhuapuite in khuangai huai sa in, an apiak ciang an ne pheang ci hi.

source:AP


Wednesday, November 23, 2011

MALAYSIA AH YAKHAINGTE KIPHIN

Malaysia ngam Yakhaing minam kipawlna te ii lampuina taw Yakhaing mi 100 val tukhawng in, Malaysia ngam UK ngam embassy zumh kong ah kiphinna Nov 24, 2011 zing nai 10:00 in nei hi.

Akiphinna ahang se, UK ngam sinsan in media aseam BBC news te ii tunung ah Kawlngam map sung Yakhaing minamte omna san ah Muslim te biakna bia ci'n laisim te telkhial tuh in, at ahikom, Yakhaing minam te lungkim ngawl na thupulaak ci'n Yakhaing kipawlna Malaysia Sizaang zumh SOM ah athu lai in hong thak hi.


thutatuam

LEITUNG AH GUITAR TUMTHIAM BEL JIMI HENDRIX KICI

Rolling Stone Magazine pan tuni ciaciang leitung ah guitar tumthiam bel pa ci'n cheptee na se Jimi Hendrix aci pa leitung ah musician tamtatak ii thukimna vote taw minphatna pia hi.

Athizawk kum 40 valzo in, Hendrix ii tum dan style se tuni ciang dong khau zamluk atum te tung ah atha nungta lai in son hi.

Atumdan se hanciamna kihel ngawl in, set-vanh (effect cikhawng) zangh ngawl in, ama ii aituam thiamna taw laibu khat Tom Morello in laibu in hawmsawm hi.

Guitar tumthiam adang ii list zongh kisua sak aa, tua sung panh ngaa ii list se akhatna Jimi Hendrix anina Eric Clapton athumna Jimmy Page alinaKeith Richards leh angana Jeff Beck te ci hi.

Blues tumthiam B. B King in alukna le ama nung zui Chuck Berry in asalina le Metal tum Van Halen in aliatna ngaa sak hi.

Source; NY daily news

NA PASSWORD LAIH KUL BANA ZIAM

Na zak password khat papo se, anuai ate sung panh ate ahi le amanlaang in nalai kik in, ci'n yahoo news tungtawn in kizasak hi.
1. password 14. master
2. 123456 15. sunshine
3.12345678 16. ashley
4. qwerty 17. bailey
5. abc123 18. passwOrd
6. monkey 19. shadow
7. 1234567 20. 123123
8. letmein 21. 654321
9. trustno1 22. superman
10. dragon 23. qazwsx
11. baseball 24. michael
12. 111111 25. football
13. iloveyou

Ningkum mi 32 million te ii password se Rockyou acite in nguk sak in, atamzaw password 10 zongh anuai abangh pulaak hi.
1. 123456 6. princess
2. 12345 7. rockyou
3. 123456789 8. 1234567
4. Password 9. 12345678
5. iloveyou 10. abc123

JERUSALAM KHUAPI LUPHUNG VAI

Jerusalem nitumna khuapi luphung se, Herod kumpipa in, asak tu man man ngawl aa, thisan ci'n Isreal taangthu kan te in, Nov 22, 2011 in son hi.

Taangthukante in, khuapi luphung (Wall) dung zui in, hawkluam te kawm pan amukhiat te aphatak akat zawk ciang Herod ii thizawk kumh 20 zawk ciang Jerusalem khuapi luphung asak tuh kiman pheang ci hi.

Heifa university pan buanman taw akivawt lal-ciin 3 mu aa, tautaw akivawt sumtang tang 17 zongh mu aa, hi amukhiatte tung ah sisan in ason ci'n Isrealnews sung ah kisua hi.

thutatuam

MALAYSIA AH NIGERIA TE 70 VAL MATTHUAK

Malaysia palik te in, Nigeria te 70 val se, November 21, 2011 in napha ngawl asep huu in man ci'n the star news sung kisua hi.

Amate se, internet tung pan ngual theam in, laidal vawttawm pawl khat vawt bek dom ngawl sum vawttawm vo zangh in kison hi.


THUTATUAM

Tuesday, November 22, 2011

USA NGAM AH PEAM TUH

UNHCR te thuthiamna tawh, Malaysia ngam pan USA ngam ah Sya Lian (Voklak) Khai te innkuan 4, le Pa Kim Khua Lian (Limkhai ) te innkuan 3 se November 28 ciang USA ngam ah ding thei tu aa, Pa Thapau (Voklak) te innkuan se, November 29 ciang ding tu hi.

thutatuam

Monday, November 21, 2011

ZOMITE LUNGDAM KONI

USA Chicago Zomi pawlpi ZCC lampuina taw Zomibup lungdamko ni se Nov 26, 2011 sun nai 2:00 hun ciang vawtsawm hi.

SENNEAL NGAM SUNG NGASAPUI NGUU

Chili ngam Senneal ngam Copiapo akici khua naina ah, Ngasa pui (Wale) ii nguu khat se, Nov 11, in mu aa, athizawk kum 2 million cingzo ci hi.

Athi thei na se, hi thu tampi in ngaisun aa, ngasa pui taw kisai cheptee tuh thu pawlkhat kihe tuam ci hi.

AP

LAITHIANGTHO BU SUNG ZATUIKHAAM KOI

USA ngam South Carolina ah, numei khat in, Laithiangthobu (ahawm) sung ah, zatuikhaam le hiam koi in, laito pan percel athak sawm na pan matthuak ci hi.

Shareca Latoya Jones akici kum28 pha numei khat hi in, tutha ciilsawng laito pan percel bawm sung ah Laithiangtho bu2 (ahawm) sung naam, 28 grams of cocaine, le cell phone koi in thongthaak khat thak sawm ci hi.

Palikte in, Jones man in amawtaw tung ah asit lai ciang, thau, zatuikhaam le sum pawlkhat matsak lai ci hi.


Source : AP

TIGER WOOD Vs HTOO TE II TIGER-PA TAYZAH KIMAI

Leitung ah golf thiam minthang Tiger Wood le Kawl lampuilui sum hau billionaire U Tayzah se singapore ah golf kimai khawm ci'n singapore straittime news sung kisua hi.

Tiger wood se, leitung level 50 na taak suk hi ka leh, aminthanna kiam ngawl lai in, ama taw akithua nuam zongh tampeuma in kison hi.

post by: pengpaleanp

AMANGN THANG DADEK KHAT KIMU KIK

Malaysia ngam om Tg. Tual Do Thang@ Tualpi S/o Pa Zam Lian (Limkhai) se, November 13, in bo vingveng hi ka leh, November 19, 2011 ciang cidam in inn cia kik thei ci hi.

Suapui Tualpi se, anasepna apu in, lungkim ngawlna nei aa, Anasepna Kota Baru akicina sang khuano khat ah mawtaw tung pan tuak sak in nusia ci hi.

Phone set natu tawm taw Innkuan puite zasak hi ka leh, angilkial in, thingkung nuai khat ah a omna panh Palik te in mu in zato puak aa, Zato athet zawk ni 3 sung khua phawk ngawl ci hi. Khua aphawk ciang, Innkuan puite paupui kik thei aa, cidam in. Inn ah kisam kik thei ci hi.

thutatuam

Sunday, November 20, 2011

PUMVA KHUA MEITAANG KIK

2011 July tha sung ngua nasiat hang in akisia Pumva khua Hydro mei laakna set sia Pumva khuapuite le Ngamsung ngampua akua mapo hanciam puina taw, Nov 9, 2011 ciang khuasung meitaang kik thei ci hi.

USA suapui te kung pan 1,300 , Malaysia pan RM 1,700 ngaa aa, Avekpi sum angaa se, Kawlsum teng 16 tukhawng ngaa ci in, Tulaitak Aizawl khua theng Pa Son Khan Thang tungtawn in thutatuam pan thu kingaa hi.

Nipi 3 sung khawng Tuanlui ah ngiak in taangtha seam ahita zong tulaitak dinmun se, meitaang thei ci ciaciang bek hi aa, hi sang ahoizaw in hanciam sawm lai ci hi.

Hi Pumva mei siatna taw kisai akua mapo tung ah Pumva mei committee in lungdamh thu ciamtee ung hong ci sak hi.

thutatuam

EGYPT NGAM BUAI KIK LALEAU

Egypt ngam ngalkap kumhpi dei ngawl in mipi te kiphin ahikom, thunei te in, akiphinte thautaw mi 20 tu khawng kaap lum ci hi.

Ni 3 sung kibuai aa, Nov 20 (nung nipini) in mipi te le Palik te alang lelang a uang zaw in, kingalvawt ci hi.

Source:Intercom

Thursday, November 17, 2011

HILLARY CLITON KAWLNGAM PAI TUH

US Ngam president pa ii sawlna tawh Hillary Cliton se, maitha sung Kawlngam ah hong pai tuh ci'n AP news sung kisua hi.

Ama hongpai le, kumh 50 sung US secretary hong pai masa phitbel hi tu hi.

Hilary Cliton se tunai teng Asean ngam teng ah azin hi in, Kawlngam hong pai le Aungsan suh kyi taw zongh kimu tu in lam etna nei hi.

thutatuam

MALAYSIA AH AUDIO BIBLE KIKHAAM

Malaysia ngam Muslim kipawlna JAIS akici pawlte in, Malay minam te tung panh aw taw akikhum Laithiangtho (Audio) bible se matsak ci'n Nov 18, Malay news sung kisua hi.

Muslim te se Tapidaw suaksak nopna taw, meingong te le, mizawngte te sum le paai taw huu ci'n ngaw aa, Audio bible sung ah, "Allah"(Pathian) ci kam mal azak zongh dei ngawl in kison hi.

Malaysia ah, Malay minam te se Muslim biakna bekma bia thei tu in thukun nei aa, Tapidaw thu taw kisai Malay kampau te in, asai thaak tu se, JAIS te in adei vet ngawl in kison hi. Tua ahikom Malaysia ah, Malay thuumh mi te in, kumhpi heak ngawl in, kuama heak ngawl tuh "Underground church" taw biakna nei hi.

Ih thunget na ah, hi Malaysia ngam om Malay te phawk tek tawng

thutatuam

TOPA TAW MAANGKHAWM

Kawlpi New Eden Hotel nei pa Thukkim se a se, Lungnat nei in, tua kawm panh Nauta(kidney) nei ahi kom, Nov 18, 2011 zing nai 3:00 pawl in hong nusia hi.

June tha sung khat vei dam ngawl in, August tha sung zongh khat vei dam ngawl in,zawm peuma ngei hi.

Ama ii taangthu atom se anuai abangh in,
Thu Tatuam

Wednesday, November 16, 2011

TUKUM ZOFA MANCHIANG ZO

ZOFA Cup 2011 Final kimai na se, November 16, 2011 nei aa, Akhatna , ani na le athumna te kituu sak hi.

Athumna se, Bethel Zomi le, Thingunau suapuite kimai in, goal kikhum mama zo ngawl ahikom, Penalty taw kisui sak aa, Bethel te in, 3-2 taw zo hi.

Akhatna se, Tedim CMBC le, St' Mary RC te kidem aa, St. Mary in 2-0 taw zo ahikom St' Mary te in tukumh ZOFA akhatna ngaa hi. St' Mary team te se tukumh taw kumh 4 akizomh suak in champion ngaa suak hi.

Tua ahikom, Akhatna St'Mary, Anina, Tedim CMBC le Athumna Bethel te in ngaa hi.

Letsong piak na vai,
Best Gaol keeper --------Bethel Zomi pan (Nang Sian Tuang.....No.18)
Best Defender--------------Bethel Zomi pan (Pau Khan Kim---------No.10)
Best Mid fielder------------Tedim CMBC pan(Neng Kop Cin---------No.8)
Best Striker-----------------Tedim CMBC pan (Lian Sian Mung------No.13)
Best Player of ZOFA Cup 2011.......Tedim CMBC pan (Neng Kop Cin ----No.8)
Golden Boot ---------------Tedim CMBC pan (Lian Sian Mung------No.13)
Best Manager--------------Bethel Zomi pan (Pa Vung Za Khup)
Third Place------------------Bethel Zomi
Second Place--------------Tedim CMBC
The Fairest Team---------Bethel Zomi

From: emung's tongsan group report

REFUGEE TAW KISAI MEETING

USA Migrant service nuai RSC le UNHCR -CDU te lampuina taw Malaysia ngam KL ah, community lampuiteng in Nov 16, 2011 in Chinese Assembly hall ah zing nai 9:30-12:00 dong maitang kim kimukhopna meeting nei hi.
  • RSC/ OPE taw kisai in dotnop tatuam te kidongh thei aa, RSC panh officer miss Tabby in, RSC taw kisai in
  • Ahai theina ahang se ih case taw kisai bel in son hi
  • Pawlkhat te se UNHCR in RSC department ah data banghma pia ngawl lai ahikom RSC in banghma sep thei ngawl hun zong om
  • UNHCR in RSC department ah case khat a aap theina tu ahun se tha 6 ahi ba le tha 7 se hai hamtang in son hi.
  • Pawlkhat security reject ci sia se, US kumhpi thunei te taw kisai in son aa, UNHCR ahi ba leh, Migrant department te in bangh mama law thei ngawl ci hi.

Hi meeting ah SOM panh Sm Kaangkok kihel thei aa, nitak sang ciang Gender Violence taw kisai zongh seminar kaa suak thei hi.

thutatuam

KI-ITNA, KI-ITNA, KI-ITNA

USA ngam Maine, Lewiston khua aa, puhuai khat le pihuai khat se ahuai kuan ciang pumkhat sua , kitenna poai vawt pheang ci'n AP new sung ah kisua hi.

Mopa se, Paul Walker 88 hi in, monu sia se, Ann Thayer 87 ci a, Lewiston rehabilitation center ah tu nipi nipizawk ni 2ni in mealheak ulenau te mai ah vawt khawm ci hi.

Amate 2 se akiheak zawk kumh 17 cingzo in kison aa, Honeymoon zongh Bermuda acina ah paisawm ci hi.

Mopa se, azi 3 na hi aa, monu atu in apasal 2na ci hi.

thutatuam



Monday, November 14, 2011

M: MALAYSIA MITHAU NGAM

Tunung hiatma WHO (World Health Organization) ii report sung ah, Malaysia ngam se mihing thau tambel ngam ci'n cheptee na ngaa hi.

Cidam na taw kisai Malaysia thunei te in, Nov 15 , 2011 news sung ah "thauna se natna hi ngawl" ci ka leh, athau te se adam ngawl na lam manaw zaw in "the star" news sung ah son hi.

Tua ahikom thau ngawl natu in, kidop tek tu in, Malaysia National Health Institute panh chief dietitian Mary Easaw-John in son hi.

Thutatuam

USA IN PAKISTAN AH HIP-HOP PANTAA

Pakistan ngam Islamabad ii US ambassy lampui na taw, Nov 14, 2011 in, US panh Hip Hop music kipawlna ahi FEW te sam in, laa sasak hi.

Hi FEW te se ni 10 tu khawng American Festival of the Art te ii sponsor taw sam sak hi.
Pakistan ngam se, tulai music taw kisai, angeina taw kisi ngawl ci aa, akheang mama ngam hi in, hi bangh aa, US kumhpi ii vaihawm na hang in Pakistani khangno te amit vaak tuam tu in kimu hi.
Source ref: AP

Sunday, November 13, 2011

IRAN NGAM NGALMAI NEAK SASEAM ZIAM?

Isreal Prime Minister Benjamin Netanyahu in nipi ni in, Iran ngam ii nuclear vai taw kisai se muanmawk sang in, apilna uh na sang zaw aa, ahai ngawl in, atomic bomb vawt thei tu hi ci hi. IAEA tung tawn in UN report in banghma pen zo ngawl ci hi.
Iran ngam in ama le ama alauhuai nuclear hiam atawl ngah tuh ngak leang hai lei tu ci'n son hi.

Iran ngam hi leh, electricity mei le khantona tatuam atu in nuclear power vawt sawm hi ung ci'n pulaakna nei hi. USA le Isreal khat papo in, hi alau huai ngalhiam te zak tuh khaam tu ahikom, hi Iran ii nuclear vai taw kisai in, thubuai pui khat hong piang tu in kimuang maw hi.

ref:AP

PUMKHAT SUANA MOPOAI

Tulaitak USA teang Nu Ciin Niang & (Dr Cope Za Pome) te ii tapa nobel Khawmpau@Maang Khawm Pau le Yangon teang Nu Hau Za Cing ( Pa Mang Kim) te tanu Lia Lian Thian Cing@Thianthian te pumkhat suana mopoai se nung nino ni YSBC biakinn ah vawt aa, Rev, Dr, Lam Cin Thang in pumkhat suana mopoai letthat hi.

thutatuam

Photo hongthak: dopui tung ah lungdam

DC AH ZOMI LASAK POAI

USA DC Kiim Zomi te in, Nov 12, 2011 in Lasak poai khat, SBMC (Sizaang Burmese Mission Church) biakinn ah vawt aa, pawl tatuam Zomi sung pumkhat suana in hong kihel thei hi.

Thu Tatuam


DC Laasak Poai - slide show

Saturday, November 12, 2011

NOVEMBER 15 CIANG PA KIPAN MEILEANG SAAP KHANG TUH

Kawlngam sung khualhawna in zak meileang te asaap khan sawm ci thu Kawl tadinsa November 12, 2011 ni in kisua hi.
Yangon-Pyi 1950 Kyats

Yangon -Mawlamyine 3250
Yangon-Dawea 5150
Yangon - Mandalay 4650
Yangon -Naypyidaw 2800
Yangon - Tarsi 4,600
Yangon - Pagan 4500
Yangon - Mawlamyine 6450
Yangon - Pyi 2450

TEDIM MYO GAWNG MUAL KHUA AH INN KAANG!!!

Laisim mimal te awng. tulaitak Tedim kiim Gawngmual khua Pa Thang Lam Cin (UPC-Naulak) te inn se 13, 11, 2011 (sunday) zingsang nai 4: hun pawl in, kaangtum hi.

Hi meikah laitak kuamana phawk man ngawl aa, Inn teakte ii heakhun ciang banghma kiphelh zo nawn ngawl in, Innteak pa se Tuimang khua Leisan seak in a omlaitak ci hi.

Innkah laitak numei 2 bek om in Pathian hesuak na taw tat ngawl ahihang, inn neinu asuataak natu in, asam (hair) tam tatak kaangtum ci hi.


Hi vai hang in, akhuapui tuipui te lung patau in aneak tuidawn akisam van lei nate kipanpui tek hi. Tukum in Tedim khua sung le Tedim kiim ah inn kang a 3vei na ahi hi.

Tedim Khangno Kipawlna
Tedim(TYF)

Friday, November 11, 2011

11. 11. 11 MOPOAI VAWT LIALUA

Hongkong ngam ah 11. 11. 11 ni (November 11, 2011) ni se kaamphat thei ni, nikhat ci'n ngaisun aa, nupa kop 1,017 in mopoai vawt ci hi.

Sente ngaisut laakdan hi leh, 11. 11. 11 se, "nuntakna khat, Khankhat sung, atawntung atu" ci'n the wall street journal sung kisua hi.

Malaysia ngam KL ah nupa kop 111 zong Putra Jaya ah kitenna vawt ci hi. Kota Kinabalu, 57 , Penang ah kop 150 ci hi. Kuantan ah Muslim kop 11 in zing nai 11:11 pawlin vawt ci hi.

thutatuam

ZOFA BAWLUNG REPORT

  1. Siyin BC Vs Tedim CMBC te. November 14, 2011 nitak nai 1:30 ciang kidem sawm hi.
  2. St. Mary CYA Vs Bethel Zomi se November 14, 2011 nitak nai 3: 15 in kidem sawm hi.

Alel te veve in, Nov 16, nitak nai 1:00 in a 3na kituu tuh aa, Azote veve in, nitak nai 2: 40 in, akhatna kituu tu hi.

thutatuam


Thursday, November 10, 2011

ZOFA BAWLUNG RESULT

St Mary CYA in, Chantha gyi BC te 2-1 taw Nov 10 in zo a, quater final kaa tu in, Tahan BC le Bethel Zomi te Nov 11 ni akidim na ah azo sia taw quater ah kidem tu hi.

Siyin BC in Galilee AG 1-0 taw Nov 10 in zo aa, Nov 11, ni Yauchokwin BC le Tedim CMBC te kidem na ah azosia taw Nov 14 ni kidem tu hi.

Final se, Nov 16 ni ciang kidem tu hi.

Source:emung's tongsan group report

AMANHAM BEL NUMEI SUNG-TEN

USA ngam New York Khuapi, Vixtoria Street Lexington Avenue Armory ah Nov 9, 2011 in Fashion Show vawt aa, leitung ah aman hambel numei sungteen (bra ) se model Minranda Kerr in sil sak hi.

Khutthiam nam 3,400 kihel sak in, dimon angitna 142 carats le pearls, citrines leaqua marines akici suang manham te kihel sak aa, dollar 2.5 million manh ci hi.


AP

SEN TUUNU (BY KYAW KHINE)

Wednesday, November 9, 2011

ZOLAI KUMH 120 CINH POAI ATU HUU NGETNA

Thu Tatuam News

ZU, NUMEI LE LAA TAW SUANI MUAKPOAI VAWT

Ngalpi II ngalkap lui kumh 108 apha puhuai khat in, ama ii birthday se Lapna (Dance) taw nasia tatak in, USA Florida ah vawt hi.

Tuniciang dong hi bang in khansau in anuntaak theina se, Zu, Numei le Laa taw nungta kahi man hi bangh in khansau khi hi ci hi.

Nipizawk ni 2ni in, vawt aa, athak siuseu aktha le zuu me khawm in lam aa, ama le ama "Nuntak na a itpa" kici in, "Zu, Numei le Laa" se kakin laitu ci'n The Miami Herald in, nilaini news sung ah sua sak hi.

UPI
Thu Tatuam

TURKEY AH ZINH-LING LALEAU

Turkey ngam ah Nov 9, 2011 nitak nai 9: 23 in zinhliing ahi kom mi 3 thi aa, tam tatak building inn akicimh te kawm ah awk lai ci'n AP news sung kisua hi.

Nung tha October 23 zinhling hang in, mi 600 bangh thi in kison aa, tutung asia tuza nasia ngawl hi.

Inn lian mama 2,000 tukhawng cimh aa, 3,700 tukhawng se om ngam tu hi nawn ngawl in kison hi.

thutatuam

COMPUTER HACKER MI 7 MATTHUAK

Rove Group akici internet thiam kipawlna te in, mun tatuam om panh internet azangh computer million 4 tu khawng khawng panh zawkthawk thu taw sum $14 million ngen ahikom mat thuak hi.

Zawkthawk thuak te se, ngam 100 panh hi in, alang tu khawng se, USA panh hi in kison hi.

US kumpi website te le iTune, Netflix azangh te se ahon ciang alaimai dang khat taw kilai sak natu in Malwear akici softwear zangh sak hamtang in sumngen aa, USA thukan FBI te in, kumh 2 zawk ciang manzo pheang hi.

Thutatuam
Ref: AP

Tuesday, November 8, 2011

THIZAWK KUMH 131 THONG TAAK KHAT ANGUU PHUM SAK

Kumh 130 acing Australia ngam mingilo khat ii nguu se, thukhen zumh in, amealheak te taw phuum khop tu thukim na pia ci'n AP news sung kisua hi.

Ned Kelly akici 1854 kumh pawl in, Victoria Australia ngam ah suak in, kumh 14 aphak lai in, ngual vanh nguuk sak na hang in thong taak ngei ci hi.

Bank khat zawk thawk thu taw laak sak in, palik khat 1870 kumh in that ahkom, 1880 kumh in kiman pheang hi. 1880 November 11 in ngui ki awk sak aa, kumh 131 thong taak sak hi. Ama hun lai in, mihing ngilo gang in amin thang aa, apumpi tung ah, thautang vutlet ngawl natu thiik lum thua thei bul in kison hi.

Ref:AP
thutatuam

IRAN NGAM LAUHAUI ZIAM?

International Atomic Energy Agency (IAEA) in Iran ngam ii nuclear power taw kisai in, pason peuma hi ka leh, Iran ngam thunei te in, Iran ngam khanto natu in hi nuclear power te akizaksawm hi in, son hi.

Isreal te in, Iran ngam ii hi bangh alau huai hiam te avawtsawm thu taw kisai in, akinging sa in, om ci thu tunipi sung Isreal news sung ah kisua hi.

thutatuam


TOPA TAW MAANGKHAWM

Dear khuapui te,

Tuzing nai 3:30 hun Neam Teuh a lupna tung ah a thisa in om hi.Zing ciang ki vui tu hi.Ta pa khat le tanu khat nei hi.A inn sia u Awn Khai te kong mai hi nawn ngawl a Pa Hminglian te taw ki theak a Pa Lian te inn lui pan ki vui tu hi.

Tu sung teng a na top ma hi tuak hi.A nu na anatna sia thi pui liang tu nat na hi bo,a thi tu zong hong son khol bo ci a nui va zai khu ve.A nu sia innkuan pui te a tu thungetna tawh phawk tek tawng.

SCC Concert sia 18-20 sung eima kung Siyin Baptist Church ah ki vawt tu a, tulaitak khangnote la a rem zawk mipi khat pha zo ve.17-18 ni sia lailam taw kisai Seminar SDA biakinn ah vawt tu hi.Thunget na phawk tek ta vun maw.


Hongphawk,

Esther
SBC

MALAYSIA UNHCR ZUMH LE SECURITY TE ZAHTA TAWNG

Malaysia ngam refugee community tatuam lampui te in, UNHCR huang sung secturity te awl mawk vawt ngawl in, ngamta ahi kom UNHCR zumh panh hi bang in a ngamtat pha sa ngawl nathu Nov 8, 2011 in community lampui te tung ah lai taw zasak hi.

Hi bang in atat thu se, refugee te taw kisai, munh hi aa, sung thu pawlkhat ki-leet thei tu thu ahikom, hi bang in atat nawn ngawl natu son aa, UNHCR staff te taw akimu nuam te in, security te tung ah son masak hamtang tu in son hi.

UNHCR officer taw kimu zawk ciang, huang puasang ah pusua pai tu zongh ngen hi.

thutatuam

Monday, November 7, 2011

MALAYSIA AH ZOTUNG KAMPAU LE ZOPHEI KAMPAU TE BUAI

Malaysia ngam Pudu Palaza naina bus stop ah, Nov 8, 2011 nitak nai 10:00 pawl in, Zotung le Zophei kampau te kihau in, mi 12 in liamlaw hi.

Nov 8, nitak Zotung kampau khua teng bawlung sui manh zawk ciang acia lam Zotung khangno pawlkhat se Beer sai ato na panh amate tetek hiam zangh in kihau ahikom, Atona sai neipa in, Chin refugee security te sam hi.

Asapte teng se Zophei kampau te ii security bek hi in, Zomi bup huam ngawl ahikom, Zotung te tung ah alemtua se lungkim ngawl in, Zotung le Zophei akihau hong suak laleau hi.

Hi bang in, akihau te Malay Palik uniform silh ngawl CID te in mu aa, alem tua hun lam Zotung kampau te in tel ngawl aa, CID te taw cip hual suk aa, CID te zongh liam hi.


Tua thu se, Lautu khangno mitmu ahikom lau in lamkaan aa atai leh Mawtaw khat in, taih thaa aa, aphei talh sasawn ci hi.

CID khat, Zophei 3 te liam in, CID te in, Palik te ko ahikom palik te mawtaw hon pui khat taw, tua kihauna kiim teng ah, amu Zomi teng baan vel ahikom Zomi 7 liam law hi.Tua aliam 7 teng se Palik te ma in Zato ah puak ci thu kizaa hi.

maamang
thutatuam

MICHEAL THINA VAI THIANG NGAWL LAI

Pop Laasa minthang Michael Jackson ii personal doctor pa se, 2009 in athi Micheal Jeckson thina tung tawn in mawnei ahi kom thong ataak kul tu ci hi.

Dr. Conarad Murray 58 hi in, Micheal Jackson thina ahang se, ama na doituam (room) sung ah khua phawk ngawlna zaa sunh in ama nguak anusiat huu aa, thi ci'n kingaw hi.

Ahi zong Dr. Conarad ii Shihni pa in, Doctor pa om ngawl laan ama le ama khua phawk ngawl na zaa kisunh in thi ci'n pang hi. Athu akician leh Doctor pa se, kumh 4 thong taak tu hi.

AP

TU KUMH MISS WOLD TANGAA NUMEI KHAT IN NGAA

Leitung ngaknu mealhoi kidemna se UK ngam ah Nov 6, 2011 final in vawt aa, Venzuela ngam ngaknu nu in ngaa sak hi.

Ama se, kumh 8 aphaciang anu le pa in nusia ahikom RC te tangaa sanginn panh khang ci'n ama ii nolai thu zongh sonna nei hi.

Kumh 22 pha in abosa hun sung hun sung akaamsiatna te, kawm pan hanciam in, radio company khat ah, nasep thei natu degree khat ngaa ci aa, suapui 13 ka nei cihi, "mihing khat papo se hanciam le anuntaakna kilaih thei hi" ci'n son hi.

Nu le pa ka nei nawn ngawl hang in, khua ngai ngawl in kison hi.

AFP

SUAPUI KOM MINAM NGALKAP KUMH 8 CING

India ngam, Assam, Tripura, le Manipur sung teng ah ateang, Kom minam thautoai kipawlna UKRA (United Kom Rem Army) te kumh 8 cinh poai se, Manipure ngam sung munh khat ah vawt hi.

Hi Kom minam te se, Zomi kam te taw akam pau kinai huai peuma aa, Maangkang minam taangthu kan te in, "old kuki" ci'n acheptee minam te hi.

Tulaitak Leitung ah numei "World Women Boxing Champion" se kom minam ahi Mary Kom akici khat hi.

thutatuam
News Ref on: Sangaipress

COLOMBIA MINCIMH MI 14 THI

Colombia ngam sak sang khua Manizales ah Nov 5, 2011 in, Ngua nasia mama zuu in, mincip huu aa, mi 14 luang hawm kimu aa, adang akimu ngawl lai honkhat ma leinuai ah thizo tuh in, muangmaw uh hi.

AP


Sunday, November 6, 2011

LEILOT THU TAW THAKHAT PATANG KHAT THASUM SANG

Nigeria ngam Zamfara state ah, tha khat patang khat se, thasum sang list sung kiheal ahi hun lam Nov 3, 2011 in, Nigeria thunei te in, mu hi.

Nigeria ngam ah, neak-nguuk nasia mama in, nung August tha in zongh, patang tha 5 khat in thasum sang sak ngei hi.

Tutuung patang tha 1 sia se, Diploma degree ngangawn ngaa sak in, leilot thu taw, kumhpi tung panh tha sum laa ci hi. Patang no ii Pa se kumhpi naseam hi in, kison hi.

Source Ref; Digital journal
Thutatuam

BANGKOK TUIKHAN MI 500 THIZO

Thai ngam tuikhan huu in athi se, Nov 6, 2011 dong mi 500 pha zo ci'n kison hi.

Bangkok leinuai lampi teng theampo tuinuai theng in, Torist te khualhaw theina teng se tui na khuum siat ci hi. Tuma kumh 20 lai in, Bangkok lampi teng se, nasia mama hoi mama in kison hi ka leh, tutuung se, ngalpi II zawk ciang, tuikhan anasia bel ci'n bangkok news sung kisua hi.

thutatuam
Photo AP

Wednesday, November 2, 2011

ISREAL NGAM AH MEETAW NGAISUTNA LAA

Isreal ngam atu alau huai Iran ngam ii nuclear vanhte sia sim tu le simh ngawl tuh mipi in, Nov 1, 2011 in mee taw khen sak aa, 41% in, thukim in, 39 % in, nial aa, 20 % in khensat thei ngawl ci hi.

Meekhiatna sung ah Isreal le Arab te kihel in, tulaitak Isreal lampui prime minister Benjamin Natanyahu le ngalkap lampui Ehud barak se Isreal ngam atu muan huai ziam ci'n mee taw khen aa, 52 % in muanghuai ci aa, 37 % in muan huai ngawl ci in, 11 % in, ngaisutna pia ngawl ci 'n Isreal news sung ah kisua hi.

thutatuam

TUITHIANG NGAWL IN, KANPALETTE KHAT MALAYSIA AH THI

Malaysia ngam Kalantan State Kota Barhu akicina ah, Kan Palet kam pau zomi khat se Oct 31, 2011 in anasep laitak puuk in thi ci hi.

Athi pa se, Tha Mana 22 s/o ??? hi in, athidan se akampanh thilua aa, puuk in thi ci hi. Post motem akivawt ciang atuineak thiang ngawl in, angil sung panh nguu suak aa, hi bang in thilaw ci thu ACR naseam te tung tawn panh thu kizaa hi.

thutatuam

MAHATI KAWLNGAM AH HAW

Malaysia ngam ii thuneilui Mhati Moharmed se, Kawlngam ah Nov 2, -4 sung taam tu in Kawlngam ah theng hi.

Tawm vei abaan sung kawl thunei te taw kimu in, Nov 3, 2011 in, Daw Aung San Suh Kyi taw zongh kimu hi.

Maharti se, Petronas datsi company ii advisor hi in, Proton mawtaw company ii managing director pipa zongh seam hi.

thutatuam

TIBET SUAPUITE NEPAL AH REFUGEE NGEN

Zomi te pianna Tibet minam te, Nepal ngam ah refugee ngen aa, Nepal kumhpi in pia thua nuam nawn ngawl hi.

Senkumhpi in, Tibet refugee te Nepal ah apai tuh khaam aa, Nepal thunei te in, zongh Sente mai-etna in nidang in apiak Tibet refugee mi 20,000 tukaan in pia nawn ngawl ci hi.

Tuhun ciang aTibet suan peuma se, refugee seau hun ziam? ci nop huai hi. Kachin, Shan, Chin, Zomi le Tibet ih pianna bulpi te ngangawn refugee kiseau kheukho hi.


Tibet Refugee - how to create a free slideshow

TIBET MINAM TE NEPAL AH REFUGEE SEAU

Senngam Tebet panh Nepal ngam ah ngambeal tu in, ataai Tibet minam te le Nepal palikte kibuai ci'n AP news sung kisua hi.

Sen kumhpi in, Nepal ngam ah Tibet minam te hi bang in, ngambeal apai se, Nepal thunei te tung ah khaam sak ahi kom Nepal kumhpi in, 1989 pa kipanh Nepal ngam ah, Tibet refugee tawlnga sak hi.

Nepal ngam ah Tibet refugee 20,000 tu khawng se, refugee laidal taw om sak thei aa, adang pia thua nuam ngawl ahikom refugee aseau te le palik te kibuai ci hi. Nepal kumhpi in refugee in apiak ciang, Tibet minam te se, Nepal ngam ah atam saseam tuh patau hi.

THUTATUAM

TOPA TAW MANGKHAWM

Sm. Ngo Vung W/o Pa Ngin Do Pau 50 + in Nov 1, 2011 in Yangon panh pumlang zaw natna taw hong nusia hi.

Ama nusiat huu in Australia sizaang innkuan ASWA in, asuapuipa pa Awn Cin Lian topuina programmee se, nov 2, 2011 in nei hi.

Tuesday, November 1, 2011

THAI AH NASEAM TE NGIMHNGAA

Thai ngam ah naseam omte anasepna ah tuikhan huu in, naseam thei ngawl in, anasepna pute in, kawlngam cia sak kik ahikom, Kawl ngam cia le la, ngam ngi pan, Thai le Kawl thunei te in, zawkthawk thu tawh sum anget tuh patau aa, khuangai huai ci'n reuters news sung ah kisua hi.

Thai ngam ah naseam tamzaw se apermit nei ngawl in kison hi.


VANLEANG KHAT AWMTAAL

USA Newyork khuapi panh Poland ngam Warsaw vanleang leen ah atuu mi 227 ato Boeing 767 vanleang se, a gear kisia in, leen sung ah awmtaal suk aa, meitawm kaang bek in, athi kuama om ngawl ci'n AP news sung kisua hi.

FACEBOOK TUNGTAWN IN NGUAL MIZAK SUAK

Zatui Khaam taw kisai naseam te in, tuhun ciang facebook, twitter le internet tung panh khat le khat kimeal heak nate zangh in, numeite vo zol in, amate naseam vo suak sak ci in, Nov 2, the starnews sung kisua hi.

Internet tung panh khat le khat kiheak zawk ciang, sum khawng thaak in, vanleang letmat tu khawng thaak aa, ki-it sak in, zol masa aa, tua zawk ciang, avanh khaam te, mun khat pa mun khat nawn sak ci hi.

Numei pawlkhat se, avan puak sia bang ziam zongh he ngawl aa, puak sak meen thathong ci hi.

2010-2011 sung hi bangh taw akiman te sung zongh Kawlngam panh numei 10, Iran 166, Nigeria 53, Thailand 41, India 13 pha ci hi.